Zomi Leh Tumging Part (III)

No3. Zomi sungah Broadcasting Station, Kawlgam ah lasa masa pen
           1962 October, 9 ni-in, Pu Cin Khen Mang in Burma Broadcasting Station panin radio ah lasak theih nading, la khum na kipan hi. Zomi sung pan, lakhum masa pen le a sa masa pen hong hipah hi. Tua bek tham loin, la tampi tak phuak in, gam ngaih la, Pasian' la, zawlla cih bangin dawng 60 val bang na phuak hi.

          1968 kumin, Zogam ah a kibawl masa pen labu, Tedim Chin Popular Songs, labu tungah zong Pu Cin Khen Mang' maan kisuaksak a, tuni dong mah in, ni thupi ni- Chin National Day cih a tun ciangin, mikim muhtheih dingin, Kawlgam Tangvan Kepna (Museum) ah Zomi makaite'n lak thei zel uh hi.

          I minam sungah hih bangin Pasian' thuphate kicingin, i Kawlgam mahmah ah zong music lam ah a madawk masa lama Topa'n hong koih manin nakpi takin i biak Pasian amin i phat hi.

Etkak thute;
U.S. Zomi Early Radio Singer, song write. (Youtube Zomi innkuan kum 5 cinna pawi, thulu (Zomi pioneer award(Music))

No4. Zomiten I La Timing, Beating-te Puahphat Hun Ta
Thulu : Beating 4/4, Style - Country
          Zomite i Zolate, timing a tamzaw pen, 4/4, 3/4, le 6/8 cihte kizang pahdeuh hi. Leitungah la a tamzaw a kiphuak khinsa pen 4/4 beat hi a, hih 4/4 beat in style (zia le tong) nam tampi tak nei hi. Zomite'n 4/4 a kicih nak leh country hi ei, ci pahpah kha zel a, tua zong i phawk thak ding i mangngilh khak thukhat ahi hi. Tua ahih manin "4/4 beat in country style" cih thu bulphuhin kikum to ni.

          4/4 cih ciang in - Bar measure, la tah kisimna, khawk khat ah tah 4 ta pha ding cihna hi. Hih 4/4 tawh lanam tuamtuam kitum thei hi. Gentehna in;

          Classic rock, soft rock, hard rock, country, 80s rock cih music-te pen 4/4 timing tawh a tamzaw kitum hi. Bar khat ah tah li(4 counts) ta a kigual ahih manin 4/4 time signature ci-in a kiciamteh na hi zaw hi.

          4/4 cih i muh leh, Country hiei cih pahna hi zenzen lo hi. Tua bek tham loin tu hun teh Blue i cih, late zong, nidang laidana 12 bar blue tawh kitum langlang nawn loin, 4/4 time signature tawh, a etlawm a zaknop dingin kitum ta hi. Gentehna in, Gospel la pawlkhat enleng, Lincoln Brewster, cihte le, Securlar lam pan John Myer, Beyonce cihte pawl.